Col 4 | PMA | STEP | Kami, avat keil, mihoumoni hetahos min slev keil onami en sise koa mal. Mihendem kati keke, kami mun, Avat onami mul en out nesa.

Colossians 4

1 Kami, avat keil, mihoumoni hetahos min slev keil onami en sise koa mal. Mihendem kati keke, kami mun, Avat onami mul en out nesa.

Pol Sel Kat Meatin Keil Usil Hisien ka Sakien One Ral Min Koakeil Arkultei Anatin en Kristo

2 Lisenges, mihehis min Ahi hetal min masmasien ka avemi namahtei eni. 3 Ka mihehis emun ven komai keke Ahi heseh voiteh keke mekilea mevahitehiten more rendemien suai onen Ahi usil Iesu Kristo. Ven selusien koanik varei, kosa namul en eim takeih. 4 Anatin, mihehis venau keke nakilea mahothot en selusien enek keke meatin keil ilong kilea eni vasuval koa mal moumoni.

5 En avong vasi koa miles ahho mul, hetal min meteisauen, mihoumon sakien tetahos min koakeil arkultei anatin en Iesu hetal. 6 Anatin, miheselus hetal min tahosien, en sakien koa kilea valeh rendemien onen meatin keil eni. Hesakini, miheilea hemukave mivasa kes selusien koa mal vaha min meatin vasi.

Selusien Ekor

7 Tikikas hehiteni min kami tounah keil koa mul kistal enau. Kei vi more tuak koa melmum vituai min Asuv. Kei mul kataunau houlu ka desien onak mul ien. 8 Sakini, namul nasila lat kei vahat ven kami, keke vahati lat rendemien onami vatal min longlongien usil komai keke mero mukave. 9 Namul nasila kei ral min Onesimas koa vi tai en kami. Kei mun vi more tuak koa desien ka envatien onak mul ien. Keilu luhehiten tounah vasi keil koa mul kur out ekok min kami.

10 Aristakas koa ro en eim takeih ral minau, kei mul viten 'more' min kami. Ka Mak emun, tunali Banabas tai, mul viten 'more' min kami. Ka munak hehat, kami mikur selusien tuai usili keke mihekur revi. 11 Ka Sosua Sastas emun koa ro ekok mul viten 'more' min kami. En koakeil avi Siu, koakeitel enek enges telmum ral minau ven hiasuvien onen Ahi. Lisenges, telkataunau ka telvati lat rendemien keil onak.

12 Epafras koa vi tai en kami ka meatin toumien tai onen Iesu Kristo, kei mul viten 'more' min kami. Lisenges, kei mul lehkao en hisien en usite onami. Kei mul vis Ahi keke vasakin kami mivalomal vakeih, demkatien onami vamen revi, ka vasakin kami mivailea revi asa koa Ahi envat kami mivoumoni. 13 Nakilea mahiteni keke kei mul mum keih vakataun kami ka koakeil emun en out Laodisia ka Hierapolis. 14 Dokta Luk koa envatien onak mul ien, ka Demas emun, luviten 'more' min kami.

15 Inau mun naviten 'more' vat min tuak ka ahinkuli keil en out Laodisia, ka vat min Nimfa ka koakeil amul asukul en teim sen. 16 Navong kami mivuli leta koanik hevus, mihesani suk min sios en out Laodisia keke keil emun ihuli. Ka kami mun mihehuli leta koa nasani min koakeil en out Laodisia. 17 Ka mihehiteni min Akipas mihehit, “Kum vasin umen koa Asuv sani minuk keke kovoumoni.”

18 Keke miheilea inau varei nasan leta ekek min kami, inau Pol namutis koanik. Naviten 'more' min kami. Eminavobong entei sen keil koa amul apar katnau eni.

Navisi keke more envatien onen Ahi hel ven kami vasi.